( تحديث )تاج السعادة

كل سنة اونتم طيبين وعيد سعيد

الأول انا بعتذر عن غيابى وعن عدم ردى على تعليقاتكم بس والله كنت بقراها كلها

ثانيا ان شاء الله انا راجعه تانى وهحاول اخلى المدونة انشط من كده يعنى هحاول انزل 3 تدوينات فى الشهر مش اتنين بس

ثالثا انا طبعا ما اعلنتش ان افتتاح مدونتى الجديده ( صدى اختناق المعانى ) اللى كتبت فيها (5) تدوينات بس انا اجلت افتتاحها مع عيد ميلادى (1/1/2009) ومع السنه الجديده وهحاول اعملها افتتاح وابثه مباشر على ( سندريلا ) المدونة دى هى اللى هتحقق الغرض اللى كنت داخله التدوين علشانه لأنى هتكلم فيها عن معانى عايشة جوايا فعلا يعنى مدونة شخصية الى حد ما وهنتظر تعليقاتكو برده بس الأساس هنا ( سندريلا ) اوعوا تنسوها

رابعا انا جانى تاج السعاده من ابن مصر وطبعا انا مقدرش اتاخر عليه فى الرد بس برده بتاسف كتير على التأخيربس انا مبسوطة اوى انه افتكرنى

......................................................

السؤال الأول:ماهى السعادة من وجهة نظرك؟

تقريبا انا اتسألت السؤال دا قبل كده بس برده هعرف السعاده دى ما عرفتها فى حدودته ( وجه الوسيم )

السعاده ليست كلمه لا وجود لها .... وانما السعاده شعور واحساس ..... يتجلى واضحا بين عيون الانسان .... فيظهر فى بريق عدسته ولو كانت سوداء حالكة ..... ويظهر فى دموعه ولو كان حزينا باكيا .... فتبدو دمعاته وكأنها ضاحكه .... وتخرج بين وجنتيه فيشع منها نور .... ويتشكل وجهه كالبدر ليلة التمام

...............................................

السؤال الثانى: كيف تصل إلى السعادة؟

انا عندى رضا ربنا هو قمه السعاده والنجاح برده

لانى لما بعمل ذنب بحس بحزن رهيب ما لوش حدود ويمكن ما لوش نهايه

..............................................

السؤال الثالث: هل السعادة وهم أم أنها حلم صعب؟

السعادة مش وهم بس ممكن تكون حلم صعب تحقيقه والحلم يا اما منام وممكن ما تيحققش يا اما طموح بيحاول الانسان على قد ما يقدر انه يحققه بس فى نقطه ساعات الواحد بيحلم حلم مش على قده يعنى حلم اكبر منه ويصمم يحققه بس بيفشل

بص العمليه عامله زى بنت راحت تشترى فستان فعجبها واحد بس كان طويل عليها وصممت تشتريه وهى ماشيه رافعته شويه من على الارض علشان ما تتكعبلش فيه وقابلت حد فى الشارع وقفت تتكلم معاه وجات تمشى نسيت ترفع الفستان فتكعبلت ووقعت

بس ساعات الواحد بيرسم الحلم على مقاسه يعنى بيفصله فالسعاده برده حلم بيجسد لكل انسان فى حاجه معينه بيحاول يوصلها

..................................

السؤال الرابع: هل السعادة طريق للنجاح ؟وضح؟

ممكن فعلا لأنه بتطبيق مبادئ علم النفس ان الحاله النفسيه للانسان بتؤثر على معدل ومستوى انتاجه

فالواحد لو سعيد هينجح بس يحاول يدور على حاجه على قده يقدر ينجح فيها علشان يحس انه سعيد بالناتج بتاعها

......................................

السؤال الخامس: ماهى أكثر اللحظات التى شعرت فيها بالسعادة؟

مش فاكره اوى بس كتير

اهمها لما بشوف فى عين بابا نظرة رضا او فرحه بيه

اقربها مثلا لما نجحت فى التمهيدى ولما اجتزت امتحانات (ICDL) بدون رسوب اطلاقا

ولما اجيب هديه عيد ميلاد ماما او عيد الام حاجات كتير

....................................

السؤال السادس:هل ممكن أن تحقق كل شىء؟

لا طبعا ممكن احقق بعض الشئ لأن لو الانسان حقق كل شئ هيطمع انما لو حققه شئ واحد هيطمح

....................................

السؤال السابع: السعادة تجعلك تقبل على الحياة أم لا؟

مش عارفه بس بيهيألى اه لان السعاده عامله زى المناعه ضد المرض لان الواحد لو حزين هيجيله كل امراض اليأس والاحباط وبالتالى مافيش حياه مع اليأس بس انا مشكلتى ان تفكيرى الزائد فى الموت بيجليى افقد لذه الحياه او الاحساس بها بالتالى السعاده ما لهاش لازمه

.............................................

السؤال الثامن: هل أحسست يوما انك وصلت لقمة السعادة؟

لما بفرح ما بحاولش اقيس قد ايه انا فرحانه علشان ماافقدش لذة السعاده

.............................................

السؤال التاسع: لماذا تمر أوقات السعادة بسرعة؟

بيتهيألى هى نفسها لما تسأل نفسك لما لما بنضحك ما ينفعش نفضل نضحك وقت طويل بس لما نحزن او نبكى ممكن نبكى عمال على بطال

بس ممكن علشان ربنا ليه حكمه فى كده ان الواحد ما يفرحش وينسى الدنيا يعنى ربنا بيقولك ما تفرحش اوى كده شوف الدنيا عامله ازاى حواليك

او يمكن السعاده ما بتتجزأش فساعه معاك وساعه مع غيرك

فانا دايما شايفة ان السعاده مزاجية الطبع ساعة تروح وساعة تيجى

....................................

السؤال العاشر: هل ترى السعادة فى التدين؟

اكيد كفايا انك بالتدين هتفكر فى الثواب مش العقاب وهتفكر انك هتقابل ربنا وتدخل الجنه مش هتفكر فى عذاب النار وعذاب القبر

.......................................

السؤال الحادى عشر: هل أنت متفاؤل وعندك أمل؟ وضح؟

متفائلة الى حد ما بس ساعات كتير بفقد التفاؤل دا عندى امل اه بس برده مش اوى لانى دايما بفكر فى الموت فمابحسش ان الحياه ليها معنى دايما حاسه ان هموت كمان ساعه فعلشان كده ما بفكرش فى الأمل بس لما بنجح فى خطوة بتمنى من ربنا انى اعيش كمان شويه علشان اكملها للآخر

.......................................

السؤال الثانى عشر: إذا شعرت بالحزن ماذا تفعل؟

ابكى انظر الى السماء وادعو الله بقلبى

.......................................

السؤال الثالث عشر: هل يستمر معك الحزن فترة ام ينقضى فى الحال؟

اه لانى بتأثر نفسيا وبيقلب معايا بقترات صمت رهيبه بس ساعات بكون زعلانه ولما اشوف اصحابى اضحك معاهم وكده بس من جوايا زعلانه

....................................

السؤال الرابع عشر: ما رأيك فى الأفراد المتشائمين ؟

ما بحبش امشى معاهم ولأنى ما بفكرش فى بكرة اصلا وبفضل اقولهم ( بشروا ولا تنفروا )

..................................

طبعا ابعت التاج لمين

انت اصلا ما سيبتش حد ممكن ابعتله بس انا هقول على اللى كنت هبعتلهم

انت طبعا ( ابن مصر )

شريف غريب

كيكى

نونو

اسير حبيبته

اسير الجراه

نبض قلب رارا

روفى

الفارس الملثم

فارس بلا جواد

انجل

حقل التيوليب الأحمر

شهر زاد

رومانسى مشاكس

المحارب المتيم

نفسى ابعته ( ممكن ) بس طبعا هو اخر من يعلم دايما

وكل اللى بيزورنى ويسيبلى تعليق حلو زيه

تحديث ) عايزة اقول حاجه مهمه ان فى حاجه يا جماعه اسمها ملكيه فكرية مهما كان الموضوع تافه حتى لو تهنئة بمناسنه العيد ما ينفعش نسرقها ونقول دى بتاعتنا يعنى انا مثلا دخلت مدونة والله صدفة اسمها ( أحزان ......) لاقيتها عامله تهنئة بالعيد منقوله من عندى وتقدروا تشوفها وتقارنوها ببتاعتى ونفس الصورة بالظبط بس طبعا الكدب مالوش رجلين لان هى كاتبه ان بقالها شهرماكتبتش زى ما انا كاتبه ودا لانها ناقله والبوست دا بتاريخ ( 1/ديسمبر ) وهى اصلا كانت منزله بوست _29 نوفمبر) تقدروا تدخلوا وتشوفوا الكلام دا بس حاجه فعلا مستفزه جدا يعنى انا بحمد ربنا ان الموضوع تافه بس المرة دى تافهه بكره تكون كبيرة انا ما كنش قصدى انى اشتم فيها او كده بس لازم نحترم بعض اكتر من كده لاننا ناس كبار مش عيال صغيرين وتقريبا انا من الناس اللى ما بضايقش حد فى تعليقاتها بالعكس حتى لما انقد بنقد ناس كبيرة وحاسسه فعلا انها تستاهل النقد لكن مش اى وخلاص .

....................................

كل سنه اونتم طيبين

وشكرا يا ( ابن مصر)

سندريلا