ما بعد الملل

قبل ما اقول اى حاجه عايزه اقول ان انتو وحشتونى جدا جدا جدا يمكن معنديش موضوع انهارده كويس لان الفتره اللى فاتت كانت فتره صعبه جدا جدا و كان كل تفكيرى ازاى اتخلص من الملل اللى حكيت عنه فى بوست سابق لكنى فى الفتره اللى فاتت دى اكتشفت حاجه ان الملل المره دى ماكنش بسبب الروتين العادى المتداول يوميا لكن كان الملل عندى من الملل نفسه يعنى ملل من الملل حاجه غبيه ورخمه وصعب التخلص منها حاجه تقتل يمكن كنت بفكر كتير طبعا ازاى هخرج منها بس للاسف جات فى دماغى افكار كتير يمكن تكون فكره ممكن يكون سؤال بس هى حاجات عامه طرأت على ذهنى قد تكون مهمه بس فعلا اللى يقدر يجاوب او يعلق ما يحرمنيش منه

اول حاجه هل الانسان ممكن يربط نفسه بفكره او قصه قد تكون حقيقيهفى ذهنه وعايشه فى قلبه وملازماه ومصاحبه تفكيره لكن عند تنفيذها على ارض الواقع يلاقيها حلم يصعب تحقيقه او قد يحيتاج نوع من التضحيه وهل التضحيه سهله اوى كده وهل سهل ان الانسان يقرر ان يضحى فى يوم وليله كده وهو عارف انه لو ضحى ممكن يخسر كتير بس هيضحى طب لو الخساره من سنين عمره هيضحى برده

تانى حاجه انت ممكن ترجع شريط حياتك وتقلب فى ذكرياتك وتخرج الحلو والوحش بس هل ممكن ترجع الماضى وتعيد ترتيب حساباتك لالالالالالالالالالالالالا

وهل ممكن انك تستعيد بقايا الماضى وتجعلها اشياء حيه فى حاضرك كالاصدقاء مثلا لالالالالالالالالالالالالالالالالالا

انا اكتشفت حاجه ممله جدا فى حياتى ومهمه برده ووحشه برده ان دماغى مابتبطلش تفكير طول الوقت شغاله ليل ونهار بس للاسف مش دى المشكله المشكله انى اما بفكر فى الماضى او بفكر فى المستقبل ودا غلط بس للاسف بالنسبه لى بقى مرض يصعب التغلب عليه

عايزه كل واحد يقرا البوست يفكر فى كام فرصة ضاعت منه هل كتير ولا شوية صغيرين وهل فى فرصه معينه لما ضاعت او لما انت ضيعتها ندمت عليها وهتفضل تندم العمر كله

هل فينا حد مر بفرصه لاقامة قصه حب ناجحه مش هتتطول وهيكون فيها الارتباط سهل جدا بدون مشاكل وانت بغباءك ضيعتها او ضيعتيها ولو فى فرص كام فرصه حب حقيقيه

الحنفيه .... بليز يا جماعه اى حد يفتح حنفيه ممكن يقفلها لاخرها لانى بجد بتعب نفسيا لو سمعت صوت الميه وهى بتنزل من الحنفيه وبتالم لانى بحس انها تشبه الدموع او تشبه شخص يبكى بصوت عالى وعامل ضجيج وازعاج ببكائه

اخر حاجه شوف كام لحظه صدق مريت بيها رجعت فيها عن قرار او اخذت فيها قرار حاسم خلصت فيها موضوع وارتحت وشوف كام مره خد فيها قرار حاسم ضيع موضوع من ايدك وندمت فى حاجه كمان هل تقدر تعمل مع نفسك واقفه وتاخد قرار وفعلا تنفذه بدون تراجع

ان شاء الله البوست اللى جاى ممكن يكون لحظة صدق ولحظه حزن ولحظه فرح حقيقيه انتظرونى

اخر حاجه عيد ميلاد مدونتى يوم 11/6 يا ترى كم واحد هيفتكرك يا حلوه ويجبلك هديه على فكره مدونتى هيكون عندها سنه واحده ويدوبك بأة اوديها تطعم ضد شلل المدونات كل سنه وانتى طيبه

انا الاول يمكن كنت بحس انى بمر بحالات ملل عابره يمكن تفضل الحاله يوم اتنين ويمكن توصل لاسبوع بس مش ممكن كنت اتصور ابدا انى احس ان الملل يقلب عندى كانه مرض بجد انا بمر بحالة ملل غريبه ورهيبه عمرى ما مريت بيها فى حياتى انا عندى ملل من كل حاجه عايزه اغير كل حاجه حوليه حتى البيت بتاعنا حاسه انى مش قادره استحمله الاوضه بتاعتى سريرى حتى عندى ملل من النوم والصحيان ومن الكلام ومن السكوت ومن اخواتى فعلا انا حاسه انى تعبانه اوى اوى مش عارفه اخلص من اللى انا فيه دا ازاى حاسه انى نفسى اخد اجازه من كل حاجه حتى من نفسى نفسى اروح مكان معرفوش وعمرى ما شفته مش هقول عايزه اشوف ناس جديده لانى فعلا مش عايزه اشوف حد خالص من كتر التعب اللى انا فيها مش قادره حتى ابص فى المرايا كل ما اقف قدامها ابقى نفسى اكسرها المشكله ان مافيش سبب لدا اطلاقا حاله غريبه حاسه بحزن فظيع معرفش ليه بجد انا مش قادره اوصف الحاله اللى انا فيها لانى فعلا تعبانه جدا حتى التليفزيون والنت مش طيقاهم حاجه صعبه فعلا نفسى الاقى حل مش عارفه حتى الكتابه زهقانه منها