وتااااااااااااااااااج

جانى تاج من حبيبتى " نونو " وانا طبعا ما اقدرش اتاخر على حد

بس انا عندى سؤال فى ناس كتير مش بتحب تجاوب على التيجان بس والله مش بضايق ولا حاجه

المهم خلينا بقى فى تاج نونو

أكتب 16 صفة عن نفسك ؟

المشكله ان الواحد صفاته كتير بس ما بيفتكرهاش بس هحاول افتكرها واحده واحده
____________________________________________

1/ ضمير على طول بيأنبنى على كل حاجه ان شاء الله لو ما عملتش حاجه اصلا برده بيأنبنى علشان كده حاسه انى هموت بمرض الضمير او اىشئ من هذا القبيل .

2/ عندى مشكلة رهيبه انى شخصيتى تحمل الكثير من المتناقضات مع انى صاحبة مبادئ وافكار خاصة بس بلاقى نفسى ساعات هاديه جدا وساعات مجنونه وبضحك ونفسى اتنطط واعمل مليون حاجه ساعات بلاقى نفسى نشيطه جدا وساعات كتيير كسلانه ومش نفسى اعمل اى حاجه ساعات بحب نفسى اوى وساعات بكرهها موت حاجات كتير كلها متناقضة مش عارفة افهم نفسى مع انى

3/ بسيطة جدا جدا جدا ومش بحب التكلف فى اى حاجه بحب الحاجه كده تبقى بسكوته ورقيقه .

4 / معرفش ليه الناس بتاخد عنى انطباع انى متكبرة ومغروره مع ان دا مش من صفاتى خالص بس دايما اللى يقربلى يعرفنى على حقيقتى ممكن لانى

5/ واثقة فى نفسى اوى بس على فكرة الانسان مش بيكون واثق من نفسه طول الوقت اكيد بتيجى ساعة والثقة دى تتهز ... بس المهم انى واثقة فى نفسى جدا .

6/ بحب حاجاتى جدا ممتلكاتى يعنى بحب اقلامى وكشكيلى وهدومى كل حاجه عندى بموت فيها ومش بحب استهتر فيها ابدا

7/ دايما عايشة مع الاطلال والحاجات القديمة مع انى بموت فى الجديد بحب فى كل حاجه جديده بس بحس ان القديم بتاعى وحبيبى اكتر من الجديد

8/ معرفش ليه دايما حاسة انى مقصرة فى حق ربنا اوى وعلى طول حاسة انى هدخل النار دايما انب نفسى اقول انتى ليه مش لابسة اسدال مثلا هتبطلى موضوع البنطلونات دى امته لو حطيت مكياج برده اانب نفسى واقول ان شاء الله اخرمرة ومش هتتكرر مع انى مش بحط غير فى فرح معين او او انسى واطلع البلكونة بشعرى افضل شايله هم الطلعة دى طول اليوم لو يوم ما صليتش الفجر بحس انى ماصلتش اليوم كله حاجات كتير مش عارفه اخرج من الموضوع دا ازاى
9/ على طول حاسة انى هموت قريب حاسة ان الموت اقرب نقطة منى وكل مره اكون مسافرة او اروح حتى اى مكان صغير لو جنب البيت افضل اتوضى قبل ما اخرج واصلى مثلا الصلاة اللى عليها الدور ومامشيش من غير وضوء لانى بكون حاسه انى هموت فى الطريق وساعتها هكون مش طاهرة وانا بقابل ربنا او مش بكون عايزة اخر حاجه تكون بينى وبين ربنا وحشة اللهم ارزقنا حسن الخاتمة اللهم امين
10 / دبلوماسية جدا جدا جدا بره مع الناس وفى البيت ساعات ساعات بس الاكتر فى البيت باخد على خاطرى بسرعة بس كتير بكون عصبية اوى اوى اوى اوى
11 / بموت فى الهدوم والجزم والشنط مدمنه شرا الحاجات دى
12 / مخلصة جدا جدا لما بحب بحب بجد
13 / كرامتى غاليه عندى اوى اوى واللى يجرح كرامتى ادوس عليه بال ............
14 / بحب عيلتى اوى وبحب اكون جنب ماما فى كل حاجه بيكون نفسى اعملها اى حاجه فى الدنيا مع انى ببقى ازعلها شويه بس والله العظيم ما حد بيحب مامته قدى
15 / انطوائيه جدا مع ان الظاهر غير كده بتلاقينى صدوقة جدا جدا جدا وكل الناس صحابى وكل الناس بتحبنى
16 / جادعة الى حد ما معقوله يعنى بس والله مش بتاخر على حد فى حاجه خالص
17 / اقدس الحزن حقا ودائما ابحث عن السعاده ولكن كثيرا ما اجد الحزن يرحب بى
18 / حظى وحش جدا جدا جدا الى ابعد حد ممكن
19 / بكره الدوشه والزعيق موت
20 / رومانسيه الى حد ما بس لدى نوعا من الواقعية وربما اضفى الواقعيه على رومانسيتى فتسود
21 / بكره الشخصيه المستفزة اللى بتيجى على جرح الناس وتدوس عليه وبكره الشخصية المتطفلة الى حد القرف والزهق فعلا بقرف منها ساعات ما اشوفها احس ان قلبى واجعنى والله او الجو اتغير وكذلك الشخصية الحقوده ما بحبهاش لانى مش حقوده
22 / مش بحط فى دماغى حد يعنى مش بشغل نفسى بالناس ولا بقعد للناس على الواحده
23 / فى حاجات كتير ممكن تحصل قدامى وما اخدتش بالى منها خالص وكلام كتير برده يتقال قدامى وما اسمعهوش اطلاقا الا اذا اتوجهلى شخصيا
24 / بكره الغدر والخيانه والظلم بطريقة مستفزة اكتر حاجات تثير اعصابى
25 / الاقتناء عيب فيه كبير جدا بحب احتفظ باقلام وورق ولعب وطوابع وصور وذكريات كتير بس الاقلام دى اهم حاجه معرفش ربنا هيشفينى من مرض القلم دا امته
26 / عشريه جدا ومش حب تفكك العلاقات
27 / بتعب نفسيا من الفراق اصعب حاجه بحس ساعتها بضيق تنفس ودموع ما لهاش حدود
28 /دموعى مش عزيزه عليه ممكن اعيط فى اى موقف مهما كان صغير
29 / بكره الفشل وبعتبره نقط سودا فى حياتى لا يمكن تلوينها
30 / فى ناس كتير جدا بتكره ساعات الوداع وماتقدرش عليها انا بتعب من الوداع لكن بحب اودع الناس قبل ما يسبونى علشان تفضل اخر نظرة فاكراها اخر سلام اخر كلمة حلوة مع السلامه او لا اله الا الله او اى حاجه حلوة .

31 / بحب ابص على الحاجات من بعيد يعنى بخاف انزل ارض المعركة وساعات تانية انزل بس اخاف افشل لانى دايما متوقعة الفشل

32 / ما بحبش افتكر عمرى قد ايه لانى بحزن على ال 22 سنه اللى فاتوا مع انى بح عيد ميلادى مووووووووووت

33 / عارفه انى جذابة جدا وبخاف اتعامل مع اى حد علشان مش يتشدلى مش غرور والله بس عن تجااااااااااااااارب كتير عمرى ما ضحكت الا لما لاقى ميت بطاقة اعجاب علشان كده دايما عندى شعور انى متراقبة

34 / لما حد بيقرا الشعر والمؤلفات بتاعتى على اساس طبعا انى شاعرة ومؤلفة كبييير جدا محدش بيصدق انى صاحبة هذه الكتابات والقرارت

35 / دايما بحس انى صانعة قرار فى وسط صحابى معرفس ليه بس بيحبونى وما كانوش يقدروا يعملوا حاجه من غيرى دا اساسى طبعا او يمكن شخصيتى قوية شويه

36 / معرفش ليه دايما الكل بيفكرنى تنشن ويرجع يغير رأيه عنى

37 / عندى شوية مبادئ كده الكل طبعا بيفكرنى عايشاها شوية

38 / ما بحبش حد يامرنى او يضطرنى اعمل حاجه من غير رضايا
39 / بحب كريم عبد العزيز مووووووووووووووت ونفسى امثل معاه ولو دور واحد هههههههههههههههه لا بلاش علشان مارجعش اانب نفسى تانى

40 / ما بحبش اعرف اخبار حد ولو كنت فى مكان فى اخبار عن بحاول اسيبه او اعمل نفسى مش سامعه ودايما لو حد سالنى عن حد او اى حاجه اقول معرفش ايه السبب برده معرفش يمكن علشان ما بحبس المشكل بس ساعات كده فى قعدة نميمة انا واختى نقلب رزقنا فى الذنوب ههههههه

بعد تعليق شريف غريب فكرنى بحاجه مهمه انه دايما بيوصفنى بالغموض وفى ناس كتير قالتلى الموضوع دا بس بصراحه باه انا برده بحس بكده

على فكرة كمان نسيت اقول انى توحديه ( طفل توحدى )

حاسة انى لكيت كتير قوى بس بجد لاقتنى بكتب من غير واقف
نونو اكيد فى حاجات كتير فى الواحد اكتر من كده بس كده كتير اوى بس اهم حاجه عارفاه عن نفسى ان سماتى الشخصية متناقضة ولا تمييز لها قعدتينى شويه مع نفسى كان نفسى اقعدهم بجد

تسلمى يا قمر على احلى هديه